"جوووون"...أسمعها وأشد في شعر وأدور في الشقة مرة علي الباب ومرة علي الشباك وأبص ع الشارع إللي طبعا فاضي .... ها تجنن يا جدعان عايزة اعرف مين إلي جاب الجون ...آة لو كان الأهلي والله لاولع لهم ف القهوة ...حد هيقولك طب ما تفتحي التليفزيون ...هاقوله ...إية الفكاكه دي كلها ؟! ماهو لو فيه تليفزيون عليه الart أو إذاعة الشباب بتلقطها كنا إتفرجنا وسمعنا الماتش ... نرجع بقى للحاله المنيلة إللي الواحد فيها ..هافضل كدة لمدة ساعه ونص دا غير الربع بتاع الاستراحة و العشر دقايق بتوع الوقت بدل الضائع ألَف في الشقة أحاول أكلم حد من أصحابي الزملكاوية أعرف منه مين إللي جاب الجون ومين إللي بيلعب كويس و الزمالك مسيطر ولا لأ ... ألاقي تليفونه مقفول ... الهواجس بتاكلني طب قافله الموبايل ليه ؟ يبقى الجون إللي جه ... جه فينا ..لا ..لا... إيه التشائم دة ؟ أكيد قافله من أول الماتش ...إخواتي الصبيان بقى علي القهوة إلي سامعة الزيطة بتاعتها وطبعا ولأني أحمل عار إني بنت فغير مسموح لي بالقعاد علي القهوه خاصة وأن بيتنا في منطقة شعبية وما ينفعش علي الرغم من إني بنت " المنتئة " أقعد وسط عمال وصعايدة أو حتى أعدي من قدام القهوة ....فيها إيه لما نقعد علي قهوة بلدي ...يعني الرجالة إلي إللي علي القهوة مش نفس الرجالة إلي بنقعد جمبهم في السكاشن وهم برضة زمايلنا في الشغل وللا دول نوع تاني ؟! جوووون لأ بقى مش قدرة ...مين إللي جاب الجون ده ؟ مش هستنى لما إخواتي الرجالة المبجلين يرجعوا بعد الماتش والإعادة بخمس ساعات علشان أعرف مين إلي جاب الاجوان دي .....خمس ساعات ده فعلا بيحصل لأنهم معندهمش دم يرجعوا بسرعه خاصة وإنهم أهلاوية ....يعني في كلتا الحالتين مش هيرجعوا بسرعة خاصة وإنهم أهلاوية ....مش هيرجعوا بدري علي شان يغلسوا عليا ... يبقى لازم أتصرف أنا .....بصوا أنا هطلع الشارع وألف كدا قدام القهاوي وأتلكع قدام قهوة ما يكونش عليها زباين كتير وأحاول أبص على الشاشة وألقط الرقم المكتوب قدام الزمالك ...يا إما أصبر لحد ما يرجعوا ...كان لازم أتصرف وأطلع أشمشم علي القهوة ... وصلت للقهوة ولمحت أحد الزملاء واقف و الباقي قاعدين قربت منه وشاورت له وقولت له إيه الأخبار ؟ زي ما يكون شاف عفريت ... "إيه إلي جابك هنا ؟ يا مجنونة ؟ " بس كان صاحب القهوة خلاص لمحني وجاب لي كرسي وكل الرجالة إلي قاعدين اتلفتوا وبصوا لي وسابوا الماتش بين إللي بيضحك وإللي بيمصمص شفايفه على بنات آخر زمن ....حتى زمايلنا في الجرنال قعدوا يضحكوا ورفعوا حواجبهم مشدودين المهم .... يا دوب قعت ومفيش غير نظرات الامتعاض دي وكأن مفيش ستات علي بعد خطوة من الكراسي ماشية قدام القهوة .... هوب جه جون في الزمالك كلهم – زميلي – طبعا قومي وشك وحش ...أنا أساسا قلت يا فكيك لأن الزملكاوية كانوا هيضربوني والأهلوية كمان يعني القهوة كلها ... رجعت البيت وأنا متغاظة لأن دخل فينا جون .... وكمان ما عرفتش أكمل القعدة والفرجة بس صدقوني كانوا أحلى عشر دقايق لأني كنت قاعدة بمزاجي ومطلعة لساني للناس كلها وحتي للأهلوية نفسهم شفتوا البجاحة ؟؟!
الثلاثاء 6 مايو 2008 - 22:37
